Leuh Pileh Pemimpin

"Na baca berita uroe nyoe, Lako Saudah?" itanyong le si Musa Keutik.
"Na. Kiban meunurot gata?" ibalah tanyong le Lako Saudah.
"Bah meunan geuh keudeh, nyan ka geurasa. Peugah nyoe, peugah jeh, rupajih ateuh rung tanyoe geucok laba!" ikeun le Musa Keutik agak-agak meupakok meunan.
"Tapi kan mantong lam pemeriksaan, Musa. Mantong na kemungkinan hana beutoi pemimpin tanyoe nyan bersalah," lon dong teungoh bacut.
"Nyang pasti ka idrob, ka ibaplung u Jawa. Bah geurasa!" iseu-ot Musa Keutik ngon ruman lage that-that bahagia.

Lako Saudah wate ikalon Musa Keutik get that beureuhi, jiseu-ot teuk ngon gaya meusinde.
"Pakon awak geutanyoe jeut meuno sabe, bang Za?"
"Meuno kiban maksud gata, Lako Saudah?"
"Asai na pemimpin keunong peukara, lage-lage bahagia teuh. Seolah-olah ka troh meukeusud hate. Padahai nyan pemimpin tanyoe. Adak pih jameun wate memilih calon nyang tabila ka talo, beliau nyang meunang, jino kenyataan jih beliaulah nyang duk keu imum. Tanyoe rakyat, makmum. Taseutot ju ile silama golom salah, nyoe ka silap ta peuingat, nyoe meutamah brat salah baro tafasah. Nyoe hana meunan. Wate imum hana salah, jimita-mita kesalahan. Peunyaket tanyoe, nyoe ka talo aju ibeudoh benci ruman bak ureung nyang meunang. Mapaki?" isurah le Lako Saudah agak panyang.

"Hana bang tukri jaweub, Lako Saudah. Memang ka lipeh that kepercayaan tanyoe keu pemimpin, dek. Pulom keu pemimpin nyang kon pilehan tanyoe. Lage gata peugah buno ju. Adak paki mantong, han pah," lon jaweub.

Musa Keutik meunyum teupeh, jiseu-ot, "hai nyoe ka terbukti salah, pu tajak bila lom? Hanjeut bila ureung salah."

Ijeweub le Lako Saudah,"nyang nyoe takeunlah ka nyoe, nyang laen-laen kiban? Pokok jih tanyoe tetap bak siklus sama: muprang, talo, deundam. Pileh, mita kesalahan, gok-gok, peurot, ganto lom. Lage-lage nyaaaaan ju sabe."

"Jadi meunurot gata kiban, Lako Saudah?" lon tanyong.

"Meunurot lon sederhana, bang Za. Untuk peukara nyoe tapreh keputusan KPK. Nyoe troh tahap ganto dan geuyu pileh bak tanyoe, tapileh nyang beutoi-beutoi jeut keu imum ju. Kiban cara jeut keu imum? Ureung beuna ilme baik donya maupun akhirat. Bek tajak pileh ureung-ureung bakai duk keu pemimpin. Beut tan, sikula han, tayu mat kekuasaan. Ateuh dasar apa pun nyan nan jih tanyoe paneuk akai. Nteuk wate ipeuget salah, kecewa lom, peurot lom, pileh lom. Lage-lage nyan keuh ju siumu masa."

"Bang Za tamah bacut jeut?"

"Jeut, kiban meunurot abang ipar?" ijaweub le Lako Saudah ka gadoh tegang.

"Wate kaleuh tapileh, tabi keu beliau kepercayaan. Takawai ngon cara get. Bek sampe harap na, peucaya tan. Bek takawai ngon teumeunak abeh ma. Geutanyoe Aceh bansa meu-adab. Beukeubeit tapeudeuh tanyoe meu-adab. Kritik ngon cara get, terhormat!"

"Memang bang Za hana dua. Bijak meunan. Kupi uroe nyoe kaleuh lon peugah bak Makcek Nur, Musa Keutik nyang bayeu. Sebab jih hana itupat lawan tanyoe dua. Tanyoe meunang," ikeun le Lako Saudah.

Musa Keutik mau tak mau harus ikot aturan dawa ino. So talo, jih bayeu kupi. Tapi lam lungkik jimarit bacut, "kiban han talo teuma, 1 lawan 2. Hana adee."

Lon ngon Lako Saudah meusigo jaweub, "MMMMAAAPAAAKII?"