Asoe Nuraka

"Ho le lawet puasa nyo hana deuh-deuh keuno u jambo, lako Saudah lon? Sang sibuk that ibadah eu?" lage biasa, lon mulayi ngon mameh meunan lako Saudah imeusapat ngon kamo.

"Hana pahla taduk ngon awak dron, nyang na bateu puasa teuh," iseuot lako Saudah lage meusipak meunan.

Mak Amin Labui nyang dari buno ji-iem mantong, lage palak iseuot,"Ka lah bak kamo hana pahala hana deuh, teuma bak meuseujid hana deuh cit dron. Taraweh tan, tadarus tan, jatah bu keu buka puasa pih hana neujok."

"Bek pakat meudawa, Min. Nyo lon teungoh ku tem meusut-sut sikin uroe nyoe," jitantang si Jafar le lako Saudah.

Bagah lon tamong,"hai pakon jeut meunan, lako Saudah? Pu hana puasa? 'O bit gura. Nyo kupeugah bak Saudah abeh kah."

"Ka bateu puasa lon, bang Za. Buno hana sengaja bak kudong-dong bineh kulah meuseujid, reubah lon lam kulah. Roh teuk meujeb ie." ingadu dro lako Saudah.

"Hai kulah meuseujid manyang 'eh keu-ing ureung rayeuk, pakon teuma jeut rubah keunan?" tanyong Mak Amin Labui.

"Homkeuh, lage pitam lon. Mungken sebab beuklam hana saho," ibila droe lako Saudah.

Lon jaweub ngon su leumoh,"nyan nan jih raseuki, lako Saudah. Jeut talanjut puasa sebab dianggap hana sengaja."

"Han jeut talanjut le, bang. Ka bateu!" iteugon lom.

"Hana bateu, nyan adak kon khilaf ka itamong bak raseuki."

"Ka bateu, bang."

"Hana bateu lom sebab hana ka seungaja. Nyan raseuki, pa'ak!" iseuot Mak Amin Labui ngon su kreuh.

Bagah jiseuot lako Saudah ngon meudhot meunan,"kiban ka peugah hana bateu. Reubah nyang hana sengaja, meunyo jeb ie cit kusengaja. Trep lon lam kulah, ukuran peunoh prut itamong ie. Hana bateu? Hah. Kah Tuhan?"

Lon ngon si Mak Amin Labui teuhah abah. Meugr'ak ju kamo beudoh dari jambo, peulikot Lako Saudah. Meunan ka kira-kira limong langkah meujak, lon ngon Mak Amin Labui paleng lom. Kamo kalon ateuh lako Saudah sira meukeun, "ASOE NURAKA KAH!"

Leuh nyan kamo plung beureutoh tamah.