Demi Pajoh Mangat

Baro seupot manakala lon ngon si Mak Amin Labui teungoh duk bak bale bineh lampoh drien teungku Bacah, troh jiteuka lako Saudah. Lam atee ka kukira nyoe akan na dawa lom antara jih ngon si Mak Amin Labui. Teuma hana pu cit, katrep hana lon kalon ureung meudawa. Jadi meunyo jadeh dawa awak nyo dua kali nyo, lon ka meurumpok hiburan.

Lako Saudah hana kom hana salam jiduk laju siblah wie lon, Mak Amin buno blah neun. Lon sama teungoh. Siat hana saleng meusu, meu lon mulayi teuk.

"Jadi meunurot dron, Lako Saudah, Mak Amin Labui pu na hayeu jih?" Kutanyong. Hai nyo seubeutoi jih lon teungoh ku pudep apui karu.

Jiseuot lako Saudah,"Mak Amin? Hayeu jih. Ok jih meuculek langgam, ruman meu-India, gaya lage Rambo, cuma tuto kadang-kadang meukureung aja. Ahahaha"

"Ahahahhaa, that carong gata bak keun keu Mak Amin, dek. Jadi na rencana balah, Min?" lon tanyong. Nyoe ka imulayi karu.

"Hana lon balah keun, bang Za. Tapi lon peuteunte sagai bak Lako Saudah. Ureung hayeu lage lon lam saboh gampong cit wajeb na sidro/ patah keumudo meunyo na dua/ meunyo na lhee karu rumoh beut/ meunyo na peut tutong sikula.// Meunyo na limong karu lam peukan/ meunyo na nam han aman kuta/ meunyo na tujoh riyoh piasan/ meunyo na lapan han aman bangsa/ meunyo sikureung nanggroe beureutoh/ meunyo na siploh kiamat donya!"

"Ahahahahhaha, nyan kha. Bereh, dek Min. Meunyo lage lako Saudah na dua dro dan seterusnya paki keadaan kadang?" lon tanyong bak si Mak Amin lom jeut meutamah su-um keadaan.

Golom seumpat teuhah babah Mak Amin, meugrum ju ijaweub le Lako Saudah, "ureung lage lon hana sep sidro/beuna dua dro keu jaga-jaga/ meunyo na lhee gampong meusaneut/ meunyo na peut ka maju bangsa// meunyo na limong nanggro ka aman/ meunyo na nam jeut ta-ek raja/ meunyo na tujoh bumo lam reugam/ meunyo na lapan jeut gok-gok donya/ meunyo sikureung bala han le troh/ ieunyo na siploh tamong syuruga!"

"Lahmaoi, donya akhirat jimat le Lako Saudah lon. Nyan hayeu!" sementara lon bela lako Saudah. Mak Amin ka hiram muka.

"Haba jih sagai nyan, Zar. Pu jak peugah jeut gok-gok donya, tingkat Saudah sidro han jeut dipeubahgia," ikeun le Mak Amin Labui lage jisipak.

"Nyan, bang Za. Na neukalon? Kon nyo lage panton lon awai buno? Jih haba kadang-kadang meukureung aja meunan. Keupu ijak ba urusan rumoh tangga lon lam dawa nyo," Lako Saudah lage palak meujampu weuh ate.

"Meunyo hana naksu jiba urusan rumoh tangga, maka bek ka-ilanya inong kah. Ka peubahgia rumoh tangga. Nyo ikeu-keu gob karu. Lon mantong male kukalon rumoh tangga awakkah!" kutamah lom teunak lako Saudah.

"Bang Za jeut keu hakim hana beutoi. Meudeh neubila beusaban. Nyo hana, meunyo lon salah aju keunong teunak. Bek le jeut keu hakim singoh lage-lage nyan. Asoe nuraka!" ikeun le Lako Saudah sira jibeudoh ijak.

"Nyoe keuh, ata kah Tuhan. Mangat ka peuteunte gob tamong syuruga atawa nuraka," itamah le Mak Amin Labui.

Bagah ipaleng Lako Saudah, trep jikalon ateuh Mak Amin Labui, leuh nyan ikeun, "meunyo kah, Min, cit krak nuraka kateume rasa. Pir'un!"

"Bahkeu, asai hana sajan ngon kah!" ibalah.

Lon lam kukalon awak nyan, bak hate kumeudoa, beujadeh keuh imeulho dua. Meunyo na nyang meulho lam gampong, na kanuri peudame. Ka pree pajoh mangat kamo.[]