PLAYBOY

Wo seumayang Suboh buno lon piyoh bak keude Mak Cek Nur. Lage biasa, jep kupi. Inan ka awai na Lako Saudah ngon peukayan jak u blang. Bak lage neuk jak keumeukoh jih. Mantong manual agam nyoe saboh. Gob ka abeh jikoh pade ngon moto, jih mantong lalo kiki sadeup. Siat kamo duk dua, ka trok Mak Amin Labui. Hana kom hana lam, sigam nyan aju jimulayi haba.

"Na lon deungo haba angen pot, ka na nyang sambot rot hate bang Za. Pu beutoi kadang haba nyan? Haba tunangan ngon sidroe dara?"

"Beutoi, Min," lon jaweub singkat. Sok meupanton jih. Nyan eunteuk meunyoe na sigo tabalah aju menyerah.

"Bagah that neucok surat pensiun dari jawatan penakluk hate aneuk dara gob lago bang Za," isambong le Mak Amin. Bak lon agak-agak jih ijak mita pasai beungoh nyoe ngon lon. Tapi lon han terkecoh.

Lon jaweub ngon su lage ureung malem, "Alhamdulillah ka meurumpok ngon nyang lage heut droe dan lage hawa ureung chik, Min!"

"Dang-dang sah ngon nyan hana rencana mita cewek laen ile meusidroe teuk?" itamah lom dosis le Mak Amin. Tenang, lon han terkecoh.

"Insyaallah akan lon meuseutia bak nyang nyoe sidroe. Adak jeut beusampe nyawong teusut, bek na meubacut meubalek setia," lon jaweun agak meupanton. Rupa lon peudeuh seulo. Lam hate, nyang pah cit kupluk kulet muka agam reuhik nyoe saboh.

"Lon hana yakin dron mampu setia bang Za," ikeun le Mak Amin lom.

Lako Saudah nyang dari buno kon jiseungap droe ngon kiki sadeup hana re meujimeusu teuk.

"Ikah Min cit kajeut keu biasa. Gob jahat ka upat, gob kembali ke jalan yang benar ka ulok," ikeun ngon su raya le Lako Saudah, meutaga bansaboh warong. Gob abeh ikalon ateuh kamo.

Mak Amin aleh seubab male atau memang ka ceubeuh, ibalah teuk ngon su han kureung raya, "lon keun sesuai fakta, Lako Saudah. Rame ureung nyang dasar jih playboy, wate meunikah akai sot teuba-ba. Na meuphom?"

"Bek kapeusapra mandum ureung, Min. Jino bukti trang ikeu mata kah kupeudeuh. Na kaingat kejadian si Musa Ketik? Cek kah nyan, adek yah kah. Sarjana mbong nyang sang-sang cit gobnyan sidroe na sok toga. Nyan jika h wate golom meukawen, teubangai-bangai leuh keu inong. Meunan kana dua droe aneuk, gatai jih ngon jeulatang. Hanjeut deuh aneuk dara, aju tik rayuan. Kaidah droe pujangga. Na katuri? Nyoe hana katuri jeut kupeudeuh foto!" bit-bit iteumigom Lako Saudah lon. Mak Amin ka teuhah babah.

"Keupu neujak ba keu gobnyan cerita? Meudeh lon nyang keun, keu lon neubalah," iseu-ot Mak Amin ka mulayi leumoh su jih.

"Nyoe keu kah hana payah keun. Aneuk muda hana mampu baca kode memanjat sangkak. Mawarni ka hek jikutru, kah mantong lale peugleh-peugleh sayeup. Jino bahasan playboy. Kiban?" ka ibeudoh beuhe Lako Saudah seubab ikalon Mak Amin Labui rap tijoh ie mata.

"Pokok jih bek ba-ba wali lam dawa," ikeun le Mak Amin. Su jih meutamah leumoh.

"Wali kah nyan saboh contoh ureung agam hana abeh masa muda. Beujeut keu pelajaran keu kah. Meudeh icontoh lage kamo dua ngon bang Za. Sebeng wie, puta uneun teungoh golom meukawen. Sigo tarek kayoh, trok peut boh pulo jeut ta meulaboh. Wate kana peurumoh, ka hana tergoda le keu inong laen. Ka sep awai. Ka tateupu bahwa hana mangat tapeutimang dua boh nanggroe keudroe teuh. Pah bak lahe han pah bak baten. Kon nyoe meunan, abang ipar?" ipeukeu ateuh lon Lako Saudah leuh ikeun nyan. Lon lam keuadaan keunong bila, kuanggok mantong.

Teuma kutamah bacut, "Min, katulong peugah siat bak si Musa Ketik, bek anggar jih ngon sikap playboy nyan. Kamo turi so jih. Wate meukeu inong droe lage lamit, ikeu aneuk dara gob sang-sang tangke donya jih mat. Nyan wali kah. Tulong peu-seulamat siat!" Lon khem. Ureung ban saboh warong geukhem dua go bak lon.

Mak Amin Labui hana ijaweub. Mata jih ka mirah wab ureung lam warong mandum teungoh peukhem jih. Nyan bak lon agak-agak lam hate jih jino na dua peukara sagai: ikeuneuk peutrep duk lam warong gob mandum peukhem jih, ikeuneuk wo ju, kontan lam siminggu ukeu jih keunong peuleceh bak aneuk agam gampong. Dianggap hana meuagam leuh talo dawa.

Lako Saudah merasa meunang, icukeh bak ming Mak Amin sigo. Awak lam warong geukhem meutaga sira geumat prut droe.