Mak Amin Labui Keuneuk Meukawen

Entah apa gerangan, Mak Amin Labui ijak bak bale beut kamo. Na siat iduk, ka meu-akuk, teungeut jih. Tapi begitu beut khatam, meublak mata jih teuhah. Ngon saleum meunyakni, imulayi ju rawi.

Mula phon jitanyong meuno, "Teungku, miseu lon peugah lon keuneuk meukawen ngon Mawarni, paki?"

Kamo mandum tergamak wate meudeungo haba nyan. Seubab memang lawet nyoe hana tanda-tanda Mak Amin Labui akan melangkah u peulaminan.

Tapi sira teuseunyom Teungku geujaweub, "alhamdulillah. Allah peumudah. Langkah ju, Min. Bek susah, jak ju."

"Tapi na bacut peukara laen, teungku," ikeun le Mak Amin Labui. Muka jih mirah iteun lara, pandangan jih bacut-bacut meutikui menahan luruh air mata.

"Pu teuma peukara laen nyan? Ci peugah, mungken na cara eunteuk," geujaweub leumbot le teungku.

"Jino yum meuh ka meuhai aju-ju. Kayem ji-ek ngon jitron. Lam keadaan meunan, keurija pih maken susah bak tamita. Di calon ayah tuan pih geucok hak reman ateuh tanyo ube-be boh u. Yum jeulame aneuk gobnyan geupuduk ju ube heut. Okelah bagi aneuk muda nyang na geupuduk leumo le ureung chik jih sebagai persiapan. Atau aneuk muda nyang ureung chik jih kaya raya. Teuma meunyo lage kamo nyang hana geutinggai meusaboh jariah pih le ureung chik, peukara meuhai jeulame nyan lage peuleupeuk u jitakat bak rung. Meusak rusok teuh wate tadeungo. Teuma memang lon rencana meunak jak lake kureung jeulame bak ayah Mawarni. Kiban surah meunurot hemat Teungku?" panyang jimeungadu aneuk agam nyan saboh. Kamo teu-iem mantong.

Geudeungo meunan, teungku kamo pih geupuduk awee. Geutarek rukok sibak lam bungkoh, geupeuhu apui keh, geucek dua go. Geutarek asap 'oh meusalop keudeh. Geuyup asap teubai u ateuh. Asap nyan jipot le angen malam nyang layoh, jioh, gadoh.

"Meuno," geumulayi haba ju. Kamo teu-iem mandum.

"Jadi peukara phon nyang harus lon ploh adalah tentang haba gata nyang tapeugah keurja nyan payah that tamita. Ci bek kamita keurja. Tapi kabuka pinto keurija. Cara jih? Manfaatkan kemampuan atau bakat. Atau miseu na modal bacut, ci buka usaha nyang kira-kira mampu kapubut. Insya Allah gata akan na keurija. Teuma teunte hana raya meubak-bak ju. Bacut-bacut ile. Nyang peunteng istiqamah. Meunyo kana usaha, ka meuraseuki, bek takeun geutakat jeulame 14 mayam, meu-40 hana goyang teuh. Nyan phon!"

Kamo meuanggok mandum. Teungku geucok glah kupi, geuteugok sigo. Geupuduk lom. Su glah meuantok ngon cupe meukeuting bacut.

"Nyang keudua. Peukara ureung chik ureung inong geupuduk jeulamee aneuk geuh ban heut hate. Logika jih meuno, miseu gata tapula modal siploh juta untuk meurumpok bloe pabrek moto antik (kadang harus ka meutunang reman lom ngon gob demi meuteume bloe). Meunan kana pabrek pasti aju mulayi tapeuget moto. Keubit leuh bak tapeuget moto, uroe malam, ukuran jipo reu-oh ube-be boh mamplam, teuprik baje-baje, teucrik luweu-luweu, akhe jih leuh moto nyan. Biaya perawatan moto antik cukop that meuhai, tapi sebab ata droe, dumban cara gata useuha peucukop. Bak saboh wate na aneuk manyak jak lake bloe moto antik gata nyan. Nyang phon ka teunte gata puduk yum. Inan ile, pu mungken neupuduk yum ukuran sep neubloe sikilo saka? Ka teunte yum moto gata tapuduk lage yum moto ureung laen. Bek koh yum pasar, meuramah keude laen nteuk. Nyan na meuho ile?"

"Meuho teungkuuu," jaweub kamo meusigo.

"Artijih, sigolom jak lake moto gob, peusiap modal ile. Ukuran padum ipeuyum beutatujeut anggok. Cara jih, useuha. Keurja, meudoa, dan beuget akai. Ata meunyo bak rupa gata cit ka hana tatujeut keun meunang, Min. Kon nyoe meunan, teungku," isambong bacut le Lako Saudah. Hai beliau ka pengalaman. Awak awai.

"Na beutoi meunan," geujaweub le Teungku. Kamo meukheuk teukhem.

"Keulhe, nyoe peunutop. Peukara rencana gata jak lake kureung jeulamee. Na tom kadeungo ikeun lam hadis bahwa perempuan shalihah nyan adalah sebaik-baik perhiasan?"

"Na teungkuuu," jaweub kamo meusigo.

"Meutuah. Jadi kaci jak bak toko meuh, pu jeut talake kureung yum meuh? Hana. Meunyo pih jeut siribe dua. Nyan pih kadang. Nyan tingkat perhiasan ata manusia peuget. Teuma inong yang shalihah nyan perhiasan Tuhan nyang peuget, katujeut jak lake kureung? Beunalah male bacut, Min." serius that Teungku kali nyoe. Kamo ka teu-iem.

"Teuma nyan inong nyang shalihah, teungku. Jino nyang jai that inong nyang hana shalihah. Lage hana sapat na le. Berarti ka payah tamita perhiasan," jiseuot aneuk muda ok indomie nyan.

"Mandum inong seubeutoi jih shalihah, Min. Teuma masalah wate sagai. Dan memang mandum bergantung bak didikan, lingkungan, pergaulan, dan nafsu jih semata-mata. Jika gata nak mita nyang ka shalihah dari awai, pertanyaan jih gata ka shaleh? Meunyo golom shaleh, leubeh get neumita mantong nyang seumateh. Jadi adak pih hana shalihah wate muda, ijih pasti akan shalihah wate leuh meunikah. Sebab jideungo haba gata peugah." geusurah leubeh trang. Kamo meuanggok-anggok.

"Jino gata nyang peurle tapubut adalah meu-useuha. Keurija beujeumot. Han sep uroe, tamah malam, jeut bagah cukop keu jeulame Mawarni nyan. Keurija malam nyan na dua macam kegunaan jih, Min. Nyang phon meurumpok gaji lembur ukuran dua kali lipat dari gaji biasa. Nyang keudua, nyan ajang latihan untuk peukhong mata, nyak mampu tableut tip malam. Ata wate leuh meukawen singoh khong mata sangat dibutuhkan. Seulaen daripada khong teu-ot," geukeun le teungku.

Kamo meuhambo teukhem.[]