MEUCEH

Bak warong kupi Bang Salam. Kejadian jih ban sagai.

"Bang, peusan mie gureng saboh!" keun Mak Amin Labui. Bak kukalon muka jih sang lage hi banleuh na haba mangat dari Mawarni. Teuseunyom-seunyom meunan.

"Indomie, pu mie Aceh, dek?" geutanyong le ureung po warong.

"Indomie ajalah," ikeun Mak Amin ngon gaya mantik meunan. Lon ngon Lako Saudah meupeurati mantong. Sebab jih bagah beungeh, hanjeut tapeukhem meubacut pih.

"Pakek telur, bang?" teudeungo dari dapu ureung po warong geuteumanyong.

"Kop jai jiteumanyong si agam brok nyan, Bang Za. Icah teuma lon," jish'ah le Mak Amin bak kamo.

"Ka peulaku jih, Min. Ka peusan beumeuceh bacut," ijok akai brok keu Mak Amin le Lako Saudah. Seubeutoi jih Mak Amin nyan meunyo bak but brok cit hana payah tapaksa, cit na bak dro jih. Nyang bek tapakat bak but get sagai.

"Ka beutoi, Lako Saudah. Gata memang sahabat sejati lon lam urusan ilanya gob. Ahahahha"

Teudeungo su tangting geupeugleh kuali le ureung po warong. Keutap-keuput su sikin meurumpok papeun cang.

"Kiban, bang?" teudeungo lom ureung po warong teumanyong sira geucang dabeuh mandum.

"Neutamah boh manok reuboh saboh, bang. Leuh neureuboh, boh manok nyan neudadar. Mie bek masen that, tapi beumeunyum sira. Bumbu dasar mie bek neuro abeh, siteungoh leubeh bacut sagai. Beukeu-eung beh. Mie jih bek that masak, beu-ukuran lage seuteungoh matang. Beujai bawang mirah, kureung sineuk dari bawang puteh. Boh kol neucang lam minyeuk, bek masak that neucroh. Tomat meunyo na nyang ijo ubeut, jadi hana payah neucang le. Bawang pree khusus on jih sagai. Toge 4 neuk kasep. Kerupuk mulieng 3 neuk mantong neupuduk bak bineh pingan blah wie!" ikeun le Mak Amin lagena ju.

Ureung po warong ka deuh beungeh, tapi geuteumanyong cit bacut teuk, "neupeusan ie pu, bang?"

"Ka peulaku lom, Min. Jeut jirasa," lon tamah jok akai brok bacut teuk.

"Oke, bang Za. Bang, neuboh ie kupi antara panas ngon dingin. Kadar saka ngon kupi beuserasi. Bek neutagun ie ngon gas, tapi ngon kaye. Ka bereh?" iseuot Mak Amin. Iseunyum bak kamo dua ngon lako Saudah. Lage glie meunan.

"Get, bang. Tapi meuno, meunurot lon rasa, pesanan droneuh hana nyang jeut kamo peugot. Mungken leubeh get neuwo u rumoh, neulake bak ureung chik droeneuh mantong," iseuot ureung po warong ngon hi beungeh.

Si Mak Amin bek lale meu-ibeudoh teuk su-um jih. "Hei, bang, bek neuba-ba nan ureung chik, beh. Nyo han ek neumeukat keupu cit neubuka warong? Pembeli adalah raja, muphom droneuh?"

"Muphom. Tapi hana lam hukom bahwa raja hanjeut tapoh mate. Meunyo ka meunyakni that, adak pih kah raja nyang na kuasa dari mata uro teubit sampo mata uro lob, tetap kupeusapat ngon dabeuh mie nyo. Lam kuali kusak!" ka iteubit dari bineh dapu bang nyan.

Mak Amin meublek-blek ikalon ateuh lon ngon lako Saudah. Kamo pura-pura hana meuturi ngon jih.[]